Deponering av forureina masser på Moltustranda

SAKEN: Det er 4 alternativ til kvar den forureina massen frå Fosnavåg hamn kan plasserast, og to av dei er på Moltu: A: Kyrkjegardsvika eller B: mellom Steinsholmen og Legeholmen. Det å flytte 80 000 til 100 000 m3 giftig slam frå hamna i Fosnavåg og opp i fjøresteinane på Moltu, vil innebere forureining og påverknad av naturverdiar i området. Problema med forureining av sjøen og strandsona er vel like stort om massane ligg på Moltustranda eller i Fosnavåg? Både fisk, krabbe og hummar gyt i området, og mange fuglearter hekkar her (m.a. ærfugl). Tiltaket vil ha stor innverknad på naturmangfaldet både på land og i sjø. Strandsona det er snakk om, er vakker natur, som m.a. vert nytta til rekreasjon, fiske og friluftsliv for lokalbefolkninga og andre. I begge aktuelle områda ligg det fleire naust, sjøbuer og nausttomter. Vil også minne om at det er berre ca. 800 m frå Kyrkjegardsvika til den truleg finaste og mest besøkte badestranda i Herøy, Moltusanden. I Kyrkjegardsvika er der ein verneverdig vòr frå 1800-talet. Dette området vil bli heilt øydelagt om tiltaket vert realisert. Ein eventuell sjete/molo vil gjere store og varige inngrep og endringar i landskapet – både i sjø og på land. KRAV: Kommunen må fjerne Moltu som alternativ for dumping av giftig slam frå Fosnavåg hamn! Dette gjeld både alternativ A og B. Moltustrandingen (Moltustranda Grendalag)