Breiband i heile kommunen

Breiband i heile kommunen. Eit viktig bidrag til folkevekst er gode kommunikasjonar og fasilitetar som dei fleste i landet har i dag. Slik er det diverre ikkje i Aurland alltid. Aurland kommune er ei sinke i utbygginga av breibandsløysingar til ibuarane, er min påstand. Rett nok er det under utbygging breiband i delar av kommunen. Diverre er det slik at bustadadresse avgjer om du har tilbodet eller ikkje. Døme: På Loven fekk dei breiband utbygt for ca 1 1/2 år sida. Medan dei som bur på strekninga frå Terum og nedover mot sentrum ikkje får tilbodet. Andre døme kunne og ha vore trekt fram. Kommunen har følgjande slagord: " Det naturlege valet" Slagordet har store forventningar i seg. Kvifor prøver ikkje våre styrande leve opp til dette. Kvifor får ikkje alle ibuarane like tilbod og mulegheiter, spør eg meg. Den teknologiske utviklinga går snøgt, og breiband i distrikts-norge har vore ei fanesak for mange fylkes- og kommunepolitikarar i mange år. Me skriv snart 2016, og Aurland kommune har enno ikkje makta å få det på plass i heile kommunen. For dårleg spør du meg.